विषय – खेळ प्राक्तनाचा…!
शीर्षक – दैवात जे मिळे ते
वृत्तबद्ध कविता
वृत्त – आनंदकंद
लगावली – गागालगा लगागा
हा खेळ प्राक्तनाचा आहे तुझा नि माझा
दैवात जे मिळे ते आहे तसे स्विकारा
जे जे असे नशीबी ते ते मिळेल तुजला
पैसा किती मिळाला नाही सुखास थारा ||१||
सकलांस दुःख आहे नाही सुखी कुणीही
वाट्यास दुःख आले आता भिती कशाची
मदतीस देव येतो श्रध्दा असे तरीही
माझेच दुःख मोठे समजूत ही मनाची ||२||
फासे सदा उलटती ठेवा मनी विचार
आयुष्य लाभले ते फुलवा फुलाप्रमाणे
माणूस जन्म आहे दुःखास तोंड द्यावे
नियतीस साथ देऊ राहू सदा सुखाने ||३||
गोष्टी समानतेच्या आहे तरी विषमता
श्रीमंत रोज खातो रोटी पहा तुपाशी
ना दैव साथ देते विश्वास ठाम आहे
दीनास घास नाही राही कधी उपाशी ||४||
नात्यात व्यर्थ होतो बाजार भावनांचा
कोणी सुखात राही कोणी मनास मारी
आनंद वाटताना नाती अतूट होती
कष्टात पोट भरतो त्यालाच देव तारी ||५||
कवयित्री : सौ. दीप्ती दिलीप यादव
मु.पो.आंबवली
ता.खेड जि.रत्नागिरी
9881846518